نیب کیسز بتا رہے ہیں کہ 25برسوں سے ڈنگہ کو ملنے والی ترقیاتی گرانٹ کہاں گئی :چوہدری جعفر اقبال

ڈنگہ(سٹاف رپورٹر)سابق امیدوار صوبائی اسمبلی حلقہ پی پی113مسلم لیگ ن کے راہنما چوہدری جعفر اقبال نے دیہات ٹائمز سے گفتگو کرتے ہوئے ایک اہم راہنما کے اخباری بیان کے جواب میں کہا کہ مقامی قیادت پر جاری نیب کیسز بتا رہے ہیں کہ 25برسوں سے ڈنگہ کو ملنے والی ترقیاتی گرانٹ کہاں گئی ہے،انہوں نے کہا کہ بعض افراد کو25سال سے زائد اقتدار میں رہنے کے بعد اب ڈنگہ شہر کو کھنڈر نظر آرہا ہے مگر اس کھنڈر میں رہنے والے خوب واقف ہین کہ ان کی اس حالت کا ذمہ دار کون ہے،انہوں نے کہا کہ اہل محلہ طاہر آباد آج تک1992ء میں ان کے لئے منظور ہونے والے کمیونٹی سنٹر کو تلاش کر رہے ہیں انہیں بتایا کہ کہ وہ کمیونٹی سنٹر کہاں بنا ہے۔

ٹھیکیدار ڈنگہ آگیا ہے، بازار میں ٹف ٹائل لگانے کا کام منگل سے شروع ہو جائیگا،ندیم اصغر کائرہ

ڈنگہ(بابو راشد سے)ناظم تحصیل کھاریاں ندیم اصغر کائرہ نے صحافیوں سے گفتگو کرتے ہوئے کہا کہ میلاد چوک سے سنیم نالا تک مین بازار میں ٹف ٹائل کی تنصیب کا کام منگل سے شروع کر دیا جائیگا،ٹھیکیدار ڈنگہ پہنچ گیا ہے،منصوبہ پر سوا کروڑ روپیہ لاگت آئے گی دوسرے مرحلہ پر تھانہ روڈ پر بھی ٹف ٹائل لگائیں گے،ایک سوال کے جواب میں 2بار تحصیل ناظم منتخب ہونے والے ندیم اصغر کائرہ نے کہا کہ سید نور الحسن شاہ کی آمدسے مسلم لیگ مزید تقسیم ہوئی ہے،پہلے ق لیگ کی مرکزی قیادت ضلع گجرات می ہونے کی وجہ سے مسلم لیگ اس ضلع میں متحد تھی اب اسکے مزید ٹکڑے ہوں گے انہوں نے کہا کہ میں نے ان دس برسوں میں تحصیل کے معاملات کو پوری دیانتداری اور کاوش سے انجام دیا،پانچ برس ق لیگ کی حکومت کا ریاستی جبر تحصیل کھاریاں کی مثالی ترقی کی راہ میں رکاوٹ رہا،فنڈز کی مسلسل بندش نے ہمارے منصوبوں کی تکمیل کی راہ میں بے شمار رکاوٹیں ڈالیں،تاہم خدا کا فضل ہے کہ ہم نے پھر بھی ریکارڈ منصوبے مکمل کروائے۔

چوہدری قمر اقبال نے اپنے کردار و افعال سے ہمیشہ پاکستان کے وقار کو سربلند رکھا،افضال محمود

ڈنگہ(سٹاف رپورٹ)چیئر مین پاکستان یونین ناروے چوہدری قمر اقبال آف پنجن شہانہ نے اپنے کردار و افعال سے ہمیشہ پاکستان کے وقار کو سربلند رکھا اور وطن کے روشن مستقبل کے لئے کارہائے نمایاں انجام دیئے،ان خیالات کا اظہار چوہدری قمر اقبال لوورز گجرات کے صدر افضال محمود نے کیا انہوں نے کہا کہ ناروے سمیت یورپ بھر میں چوہدری قمر اقبال کی اوورسیز پاکستانیوں کے لئے گراں قدر خدمات اور پرخلوص کاوشوں کا اعتراف کیا جاتا ہے،ان لازوال خدمات کو دیکھتے ہوئے ہم نے پاکستان میں چوہدری قمر اقبال لوورز کا قیام عمل میں لایا ہے پہلی سطح پر اس کا آغاز ضلع گجرات سے کیا جا رہا ہے،اس موقع پر سیکرٹری مالیات محمد بلال احمد بٹ نے کہا کہ یہ قدم اس لئے بھی اٹھایا جا رہا ہے کہ پاکستان کے لیے اچھا ورک کرنے والوں کی حوصلہ افزائی کی جائے اور ان کا ساتھ دیا جائے تاکہ دوسرے لوگوں میں بھی جذبہ پیدا ہو اور یہ مشن مزید آگے بڑھے۔

ایڈیشنل سیشن جج کھاریاں رائے نذیر احمد نے چارج سنبھال لیا

ڈنگہ(محمد بلال احمد بٹ)ایڈیشنل سیشن جج کھاریاں رائے نذیر احمد نے چارج سنبھال کر کام شروع کر دیا،ان کے پیش روایڈیشنل سیشن جج کھاریاں چوہدری محمد یوسف اوجلہ کا تبادلہ لاہور کر دیا گیا ہے۔

ڈی سی او گجرات سردار جاوید اکرم نے سرکاری ملازمین کوآفس میں براہ راست رابطہ سے روک دیا

ڈنگہ(محمد بلال احمد بٹ)ڈی سی او گجرات نے سرکاری ملازمین پر براہراست ڈی سی او آفس رابطہ پر پابندی عائد کر دی،ضلع بھر کے مختلف سرکاری اداروں میں کام کرنے والے ملازمین اپنے ضلعی افسران سے رابطہ کریں اور کسی بھی قسم کی شکایت کیلئے اپنے افسران کو درخواست کریں۔

گیپکو کا تمام ملازمین کوبنیادی تنخواہ کے مساوی بونس دے گا

ڈنگہ(محمد بلال احمد بٹ)گیپکو نے بہترین کارکردگی کی بنیاد پر اپنے تمام ملازمین کو ان کی ایک بنیادی تنخواہ کے مساوی بونس دے رہا ہے بونس کا اعلان وفاقی وزیر پانی و بجلی راجہ پرویزاشرف نے پاکستان ہائیڈروالیکٹرک سنٹر لیبر یونین کے سالانہ کنونشن کے موقع پر بختیار لیبر ہال میں بونس کے مطالبہ پر کیا تھا ڈنگہ کے64سے زائد واپڈا ملازمین کو بھی اضافی بونس کا فائدہ پہنچا،صدر لیبر یونین گیپکو سب ڈویثرن ڈنگہ ٹو نے اپنے ایک بیان میں کہا ہے کہ لیبر یونین مرکز سے سب ڈویثرن ہر سطح پر ملازمین اور لیبر کی بہبود کے لیے اپنی کاوشیں انجام دے رہی ہے،دوسرا اضافی بونس دلوانے کے لیے واپڈا یونین نے بھر پور کردار ادا کیا ہے انہوں نے اس موقع پر مطالبہ کیا کہ واپڈا ملازمین کی تنخواہیں بڑھانا وقت اور مہنگائی کا تقاضہ ہے تمام ملازمین کی صوبوں اور مرکز میں تنخواہیں بڑھین لیکن حکومت نے واپڈا ملازمین کو مکمل نظر انداز کر دیا ہے۔

اتووالہ پل پر موجودہ ناکہ کو باضابطہ چوکی کا درجہ دے دیا گیا

ڈنگہ(رانا قاسم حسنین علی سے)عوامی مطالبہ اور ڈی پی او گجرات طارق عباس قریشی کے مشورہ پر آر پی او گوجرانوالہ چوہدری ذوالفقار چیمہ نے اتووالہ پل پر موجودہ ناکہ کو باضابطہ چوکی کا درجہ دے کر سب انسپکٹر غالب حسین کو انچارج چوکی تعینات کر دیا گیا ہے،تھانہ کھاریاں کے ماتحت چوکی میں فی الحال8ملازمین تعینات کئے گئے ہیں جنکی تعداد میں بعد ازاں اضافہ کر دیا جائے گا،اتووالہ،کراڑی والا خورد و کلاں،حاجی چک اسماعیلہ سمیت کئی گاؤں چوکی کے علاقہ میں آئیں گے۔

لیڈی کونسلر زیتون بیگم نے تین بار کونسلر شپ کی مدت پوری کی

ڈنگہ(رانا قاسم حسنین علی سے)رواں ماہ میں اپنی مدت پوری کرنے والی سابق خاتون کونسلر یو سی108ڈنگہ ٹو،زیتون بی بی،ڈنگہ کی وہ واحد خاتون کونسلر ہیں جنہوںنے تین بار کامیابی سے اپنا ٹینور پورا کرنے کا اعزاز حاصل کیا وہ1997ء میں اس وقت بلدیہ ڈنگہ کی پہلی بار کونسلر منتخب ہوئیںجب میاں محمد اسلم چیئر مین تھے نیا نظام آنے کے بعد زیتون بیگم دونوں بلدیاتی انتخاب میں کامیاب ہوئیں انہیں ہمیشہ عوامی تائید حاصل رہی دوسری بار اسی یونین کونسل کی سابق جنرل لیڈی کونسلر سیدہ زاہدہ بخاری نے آخری الیکشن میں دو ہزار دو سو کے قریب ووٹ حاصل کئے جو کسی بھی خاتون کونسلر کے زیادہ سے زیادہ ووٹ حاصل کرنے کا ریکارڈ ہے۔

دوستوں اور عوام نے کہا تو آزاد حیثیت سے دوبارہ الیکشن لڑوں گا:الحاج محمد صادق بٹ

ڈنگہ(سٹاف رپورٹر)سابق ناظم ڈنگہ ون ایوارڈ یافتہ سماجی شخصیت و تاجر الحاج محمد صادق بٹ نے دیہات ٹائمز سے گفتگو کرتے ہوئے کہا کہ اگر دوستوں ساتھیوں ارو میرے عوام نے مجھے کہا تو پھر آزاد حیثیت سے الیکشن میں حصہ ضرور لوں گا،میں نے دوبارہ الیکشن لڑا،دونوں بار کسی فیصلہ سے قبل حلقہ کے تمام لوگوں کو اکٹھا کر کے ان کو کہا کہ وہ جس کو اس ذمہ داری کے لئے چنیں گے،میں خلوص نیت سے اس کی حمایت کروں گا،یہ اہل حلقہ کی مہربانی ہے کہ انہوں نے دونوں بار میری خدمات اور کاوشوں کو دیکھ کر مجھے ہی منتخب کیا،میں اس بار بھی ان سے مشورہ کے بعد کوئی قدم اٹھاؤ ںگا،ایک سوال کے جواب میں کہا کہ میرا کسی سیاسی پارٹی کے ٹکٹ پر بلدیاتی الیکشن لڑنے کا ارادہ نہیں ہے کئی پارٹیوںدھڑوں اور انتخابی اتحادوں نے مجھ سے رابطہ کر کے ان کی طرف سے لڑنے کی آفر کی،میں ان کے خلوص پر مشکور ہوں مگر میری پارٹی غریب عوام ہیں میں ان کی رائے کے مطابق آزاد حیثیت میں خدمات انجام دو ں گا،الحاج محمد صادق بٹ نے کہا کہ میرے دونوں ادوار مین میرے تمام کونسلر ز اور نائب ناظمین نے میرے ساتھ بھر پور اور مکمل تعاون کیا اور میں نے بھی کوشش کی کہ ان کی مشاورت سے کونسل کا ہر کام سر انجام دیا جائے خدا کا شکر ہے کہ اس بلدیاتی نظام کے دونوں ادوار میں میرا اور میرے تمام اراکین کا دامن کرپشن سے آلودہ نہیں ہوا عوامی خدمت کے لیے بلدیاتی فنڈز انتظار کئے بغیر اپنی جیب سے خرچہ کر لیا،میرے دونوں ادوار بطور ناظم عوام کے سامنے ہیں،انہوںنے دیکھا کہ میں نے کس طرح ان کے ہر مسئلے پر حل کی بھر پور کوشش کی ہے۔